Borgemánu 17. beaivvi dán jagi álggaha Lávgu sámegiellakurssa easkaálgiide mas lea vejolašvuohta čađahit eksámeniid. Oahpahus lea beaivet, ja dat lea ovttasbargu UiT- Norgga árktalaš universitehtain. Lea vejolaš háhkat 10, 20 dahje 30 oahppočuoggá dahje dušše oassálastit kurssas nu ahte ii čađat eksámeniid.
– 2026 čavčča lágiduvvo álgokursa ođđa vugiin, gos leat eksámenat main lea 4-5 vahkkosaš gaska. Lea okta eksámen čakčamánus, nubbi golggotmánus ja maŋimus skábmamánus/juovlamánus. Jus galgá beassat joatkit de ferte ožžon dohkkehuvvot geatnegahtton čálalaš bargguid ja ceavzán ovddit dási eksámena. Lávggu bealis mii illudit álggahit dán kurssa, dadjá beaivválaš jođiheaddji Marit Kirsten Eira.
Son ávžžuha olbmuid geain lea beroštupmi dieđihit kursii dáppe:
Sii geat háliidit čađahit eksámena/eksámeniid, fertejit ohcat ovttaskas oahpu studeantan UiT ohcanvuogádaga bokte Søknadweb:s, gaskal suoidnemánu 20. beaivvi – borgemánu 9. beaivvi.
Álgooahput beaivet
Álgokursa sámegielas lágiduvvo beaivet. Kurssat vástidit daid kurssaid maid Lávgu lea ovdal lágidan, muhto dain lea eará eksámenvuohki. Lea geatnegahtton oassálastit unnimusat 75% oahpahusas. Vuosttaš kursa, SAM-1040, deattuha álkes njálmmálaš ja čálalaš gulahallama; oasseváldit galget guldalit, ipmirdit, hupmat ja čállit. Čálalaš hárjehusat leat doarjjan njálmmálaš giellageavaheapmái. Kurssa nubbi oassi gohčoduvvo SAM-1041:n ja maŋemus oassi fas SAM-1042:n.