Lávgu lágida sámegiellakurssa easkaálgiide, mas lea vejolaš čađahit eksámeniid.
Ovttasráđiid UiT- Norgga árktalaš universitehtain Lávgu lágida beaivekurssa mas lea vejolaš háhkat 10, 20 dahje 30 oahppočuoggá. Lea maid vejolaš dušše oassálastit kurssas nu ahte ii čađat eksámeniid.
Dán jagi kursa lágiduvvo earáládje go ovdal: čađahuvvojit eksámenat main lea 4-5 vahkkosaš gaska. Eksámenat leat čakčamánus, golggotmánus ja skábmamánus/ juovlamánus. Jus galgá beassat čuovvut kurssaid viidáseappot, de ferte ceavzán ovddit dási eksámena ja geatnegahtton čálalaš bargguid. Kursaoasseváldit dahje studeanttat fertejit rehkenastit áiggi bidjat kursii ja maid ruovttubargguide.
Lea geatnegahtton čuovvut kurssa unnimustá 75 %. Vuosttaš ja nuppi kurssas lea njálmmálaš eksámen. Eksámengiella lea davvisámegiella ja njálmmálaš gulahallan deattuhuvvo, mas leat gažaldagat ja vástádusat. Oahppoovttadat SAM-1040 deattuha njálmmálaš ja čálalaš gulahallama; guldalit, ipmirdit, hupmat, lohkat ja čállit. Čálalaš hárjehusat leat doarjjan njálmmálaš giellageavaheapmái.
Vahkkoplána gárvána miessemánus/geassemánus ja sáddejuvvo sidjiide geat leat dieđihan iežaset kursii, dahje jus dáhtut oažžut dan sáddejuvvot. Kurssat leat seamma go dat maid mii ovdal leat fállan (SAM-1031 ja SAM-1034). Ođđa namma kurssain lea dál SAM-1040, SAM-1041 ja SAM-1042.
Lea dehálaš ahte dieđihat iežat kursii dáppe. Dieđihanáigemearri lea 09.08.26. Dasa lassin fertejit studeanttat ohcat ovttaskasoahpu studeantan UiT:i Søknadsweba bokte áigodagas 20.07. – 09.08.26.
Fuomáš ahte UiT Søknadsweb ii leat rabas ovdal suoidnemánu 20. beaivvi.
Don ozat dáppe: UiT søkeside