Leaibedearbmi (Ráirrus)

Ráirrus deaivvadit mii vilbeleš ja oambeleš guovttuin Willy Karlseniin ja Helga Johanne Lundain. Soai muitaleaba guvttiid vuoddagiid ja oanehis čuoldda bihtá birra. Daid lea čuoldán sudno áhkku Helga Kristine Olsen, gii lei riegádan 1886 Strand goargguin, ja gii orui Leaibedearpmis Ráirrus.

Vuosttaš vuoddagat leat assás dievdduvuoddagat, mat leat njuikkohuvvon ruovttu bodnon láiggiin. Nuppit vuoddagat leat dát mat leat govas. Dat leat čuldojuvvon. Dávjá lea čuolddavuoddagiin rukses minsttar vilges vuođus. Minstara čuoldá go váldá bajás čuoldda láiggiid, mat leat daid vielgadiid gaskkas. Helga muitala ahte dakkár vuoddagiid ádjána guhkit čuoldit, ja dan dihte adnojedje dakkárat nuvttohiidda dálvet go čiŋadedje. Čázetvuoddagat beaivválaš anus dulve jođáneappot, sihke bihka, guollevuoja ja mođiid geažil, ja danne ledje dat álkibut dahkkon.

Helga muitala ahte dalle go sii nuppi máilmmisoađi áigge fertejedje báhtarit ruovttus, de ledje sus ođđa čázehat juolggis. Son muitá go juhke skuovaid sidjiide geain ledje heajos juolgeváđut. Son muitá iežas go geigii čázehiiddis, ja sávai oažžut ođđa skuovaid. Oahpaheaddji gii dan galggai árvvoštallat, son gal oaivvildii ahte sus ledje hui buorit juolgeváđut, ja dan dihte son ii ožžon ođđa skuovaid. Dan beaivvi rájes ii šat son sáhttán liikot dien oahpaheaddjái. Dat ledje maŋemus čázehat maid son lea eaiggáduššan.