Verddevuohta lea dološ sámi árbevierru mii lea oktavuohta ja ustitvuohta gaskka johttisápmelaččaid ja mearragátteolbmuid geat bistevaččat ásset giliin gosa johttisápmelaččat johtet. Dát ustitvuohta lea ávkin goappašiidda, gos sáhttiba lonohallat gálvvuid ja veahkáhallat goabbat guoimmiska.
Juohke jagi go boazosápmelaččat johttájedje mearragáddái, de sii fas deaivvadedje ja ovttastalle iežaset verddiiguin. Mearragátteássit gilážiin válde sin bures vuostá, go sii viimmat ollejedje geasseorohahkii. Lei oktiigullevašvuohta ja searvevuohta, ustitvuohta ja maid bálvalusaid/gálvvuid lonohallan. Nu lei maiddái ollu giliin Álttá suohkanis.
Verddevuohta lea hui čáppa árbevierru, ja mii háliidivččiimet leat mielde dán fievrrideamis viidásit, ja nu maiddái háliidivčče Lákkonjárgga orohat ja Gávvuona gilisearvi.
Lávgu, Lákkonjárgga orohat ja Gávvuona gilisearvi bovdejit fárrolaga verddedeaivvadeapmái Gávvunnii.
Lágideamis šaddá stoahkan, eará doaimmat, ja mii guossohit biepmu. Lea nuvttá oassálastit verddedeaivvadeamis, ja biebmu lea maiddái nuvttá. Váldde áinnas mielde campingstuolu ja buori movtta!
Mii guossohit biepmu gitta biebmu nohká.
Lágideapmi lea rabas buohkaide ja buot agi olbmuide Gávvuonas, eará báikkiin Álttás, ja maid buot eará báikkiin.
Dieđut mearrasámi vahku birra:
Prošeavtta ulbmil lea ovddidit mearrasámi kultuvrra, giela ja historjjá.
Jagis 2026 galgá mis leat mearrasámi mánnu, mii juhkkojuvvo njealji vahkkui olles jagis.
Mearrasámi vahkuid lágideami vuođđun lea sámi giellavahkku-konseapta, gos leat iešguđetlágan doalut ja lágideamit daid vahkuid. Mearrasámi vahku/mánu oktavuođas galgat gaskkustit ja čalmmustahttit mearrasámivuođa riddoguovlluin, ja buktit ovdan resurssaid mat gávdnojit dáid guovlluin, namalassii olbmuid, dávviriid, muitalusaid, jna.
Sámediggi lea ruhtadan prošeavtta.