Duorastaga golggotmánu 22. beaivvi eat beasa atnit lášmmohallanlanja. De deaivvadit olggobeal Gorrevári skuvlla, ja čiekčat spáppa ja stoahkat dii 17-19 rádjái.
Mánáideahket
Mánáideahket lea fálaldat sámegielat mánáide gaskal 6-12 jagi. Deaivvademiin leat iešguđetlágan doaimmat ja sámegiella ja sámi kultuvra deattuhuvvo.
Min ulbmil lea nannet ja viidáset fievrridit sámegielat mánáid giela, kultuvrra ja identitehtadovddu, fállat sámegielat astoáigefálaldaga ja láhčit dili nu ahte sámegielat mánát geat orrot iešguđet báikkiin Álttás besset deaivvadit ja oahpásmuvvat.
Giellavahkku birra:
Giellavahku ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Juste dán vahkus galget sámegielat gullot ja oidnot juohke sajis.
Giellavahkku lea veahkkálasbargu čalmmustahttit sámegielaid ja loktet máhtu daid birra olles servodagas. Priváhta ja almmolaš ásahusat, ealáhuseallin, organisašuvnnat ja eará aktevrrat bovdejuvvojit oainnusmahttit sámegielaid juste dán vahkus. Ovttas váldit mii stuorábuš ovddasvástádusa sámegielaid gullomis, oidnomis ja geavaheames buot servodatsurggiin.