Sámegiela eahketkursa easkaálgiide álgá borgemánu 18. beaivvi, muhto sáhttet boahtit rievdadusat.
Kursa lea 140 diimmu ja bistá njukčamánnui 2027 rádjái.Vurdojuvvo ahte bijat áiggi ruovttubargguide.
Mii lágidit guokte olggobeale logaldallama gos lea bákkolaš searvat unnimustá ovtta logaldallamii. Dáhtonat bohtet giđa mielde.
Don oaččut kursaduođaštusa go leat oassálastán unnimustá 80% kurssas. Kurssas lea 1500 ruvdnosaš dieđihandivat, mas mii máhcahit 800 ruvnnu jus leat čađahan kurssa ja ožžon kursaduođaštusa.
Diibmoplána sáddejuvvo miessemánu buohkaide geat lea dieđihan kursii – ja dan rádjái lea maid vejolaš geassádit kurssas nu ahte ii dárbbaš máksit divada. Go rehket vuos lea sáddejuvvon, de dat lea máksingáibádus mii doalahuvvo vaikko maŋŋelaš celkkežat eret kursasaji.
Kursa lágiduvvo 1-2 geardde vahkus eahkediid dahje vahkkoloahpaid, ja dán jagi lágiduvvo kursa disdagaid ja duorastagaid nu guhkáš go lea vejolaš.
Dat mii lea ođas dán jagi lea ahte don maiddái galggat čállit motivašuvdnareivve go dieđihat. Man olu motivašuvdna dus lea oahppat sámegiela dán jagi? Leat go ráhkkanan ahte dasa ahte dat doalvu olu áigi? Mii buohtastahttit giela oahppama maratonaviehkamiin. Jus galggat oassálastit maratonaviehkamis, de fertet vuoruhit hárjehallat. Don fertet eará doaimmaid guođđit ja olu hárjehallat, ja vejolaččat vuoruhit rievttes biepmuid borrat. Seamma lea giela oahppat; don fertet vuoruhit giela ja arenaid gos giella gullo ja adno.
Motivašuvdnareive galgá leat birrasiid ovtta siiddu (dahje 300-500 sáni). Muital manin don háliidat oahppat sámegiela, man ollu astu dus lea giellaoahppamii, áiggut go fitnat eará sámegielat arenain go giellakurssas, ja čále áinnas eará dieđuid mat du mielas leat áššáigullevaččat. Čále reivve juogo dása, dahje sádde e-boastta čujuhussii post@lavgu.no:i.
Jus it háliit čállit, de sáhtát báddet gos muitalat ja sáddet dan seamma čujuhussii.
Dieđihanáigemearri lea 29. b. geassemánus 2026.
Váldde áinnas oktavuođa beaivválaš jođiheddjiin jus ležžet gažaldagat.
Mii álggahit maid kurssa gos sáhtát olahit oahppočuoggáid, geahča sierra doaimma dan birra.