Goalmmát deaivvadeapmi MSÁÁ-prošeavttas (Mu sámi árgabeaivi Álttás <3 Min samiske hverdag i Alta) šaddá čakčamánu 23. beaivvi.
Mii deaivvadit Lávggus diibmu 16:30.
Mii boradit, ja de vuolgit olggos viežžat luonduávdnasiid maiguin ráhkadit fiinna čakčakollasja. Dat galget leat de oassin čájáhusas mii lágiduvvo loahpas prošeavtta, boahtte jagi.
Muitte dieđihit!
Mu sámi árgabeaivi Álttás <3 Min samiske hverdag i Alta
Lávgu lea ožžon juolludeami Samfunnsløftetis, Seastinbáŋku 1 Davvi-Norggas álggahit ođđa prošeavtta; “Mu sámi árgabeaivi Álttás <3 Min samiske hverdag i Alta”, gos mii máŋgga deaivvademiin galgat oahppat iešguđetlágan dáiddasurggiid, ja dáid dáiddasurggiid bokte hábmet dáidaga mii gaskkusta movt lea leahkit sámi mánnán Álttás. Dát prošeakta loahpahuvvo áidnalunddot, erenoamáš čájáhusain boahtte jagi.
Lea vejolaš searvat daidda deaivvademiide masa háliida, ja juohke deaivvadeapmái šaddá sierra dieđiheapmi. Ja mii sávašeimmet ahte nu ollugat go vejolaš servet buot bargobájiide.
Juohke deaivvadeamis ožžot ovtta liibmamearka. Maŋemus deaivvadeamis šaddet dat loattat maid mii vuorbádit. Dađi eanet liibmamearka, dađi eanet loattaid oažžu.
Prošeakta lea buot sámi mánáide Álttás, ja sámegiella ii leat gáibádus.