Mii bovdet mearrasámi giellalunšii. Dát lea dutnje geas lea gullevašvuohta ja beroštupmi hupmat dahje oahppat mearrasámi suopmana.
Dát davvisámi suopman lea garrasit áitojuvvon, dan dihte midjiide lea dehálaš ásahit deaivvadanbáikkiid gos olbmot besset hupmat dán suopmana gaskaneaset, seammás go dat addá vejolašvuođa juohkit máhtu ja maid viiddidit giellageavaheami earáide.
Ságastallanfáddá: Gávcci jahkeáigodaga rittus- Mii dahkko goas jagis mearrasámi kultuvrras?
Mii guossohit váffeliid iešguđetlágan suvlliiguin.
Dieđut mearrasámi vahku birra:
Prošeavtta ulbmil lea ovddidit mearrasámi kultuvrra, giela ja historjjá.
Jagis 2026 galgá mis leat mearrasámi mánnu, mii juhkkojuvvo njealji vahkkui olles jagis.
Mearrasámi vahkuid lágideami vuođđun lea sámi giellavahkku-konseapta, gos leat iešguđetlágan doalut ja lágideamit daid vahkuid. Mearrasámi vahku/mánu oktavuođas galgat gaskkustit ja čalmmustahttit mearrasámivuođa riddoguovlluin, ja buktit ovdan resurssaid mat gávdnojit dáid guovlluin, namalassii olbmuid, dávviriid, muitalusaid, jna.
Sámediggi lea ruhtadan prošeavtta.