Sámi giellavahkus 2026:s Lávgu doallá logaldallama sámi báikenamaid birra Álttáguovllus.
Lávggus lea sámi báikenammaprošeakta mii lea dál jođus, mas čohkket ja kvalitehtasihkkarastit sámi báikenamaid Stuora- ja Uhca Liidnavuonažis, Gámavuonas, Fielvuonas ja Gárggus.
Dán logaldallamis gulat muhtin sámi báikenamaid duogáža ja mearkkašumi birra Álttáguovllus. Maid sáhttet sámi báikenamat muitalit historjjá, kultuvrra, báikki doaimma birra, makkár dehálaš dáhpáhusat leat doppe dáhpáhuvvan ja movt dáid guovlluin berre vánddardit?
Logaldallamis muitaluvvo maid movt dáruiduhttin lea váikkuhan sámi báikenamaide, movt dat leat dihtomielalaččat rievdaduvvon ja boastut čállojuvvon. Mii namuhit maid muhtin miellagiddevaš fáktadieđuid, “fun facts”, Álttáguovllu sámi báikenamaid birra.
Mii háliidit boktit dihtomielalašvuođa sámi báikenamaid birra Álttás. Sámi báikenamaid áimmahuššan ja gaskkusteapmi lea dehálaš suodjalan dihte áitojuvvon giela ja kultuvrra.
Giellavahkku birra:
Giellavahku ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Juste dán vahkus galget sámegielat gullot ja oidnot juohke sajis.
Giellavahkku lea veahkkálasbargu čalmmustahttit sámegielaid ja loktet máhtu daid birra olles servodagas. Priváhta ja almmolaš ásahusat, ealáhuseallin, organisašuvnnat ja eará aktevrrat bovdejuvvojit oainnusmahttit sámegielaid juste dán vahkus. Ovttas váldit mii stuorábuš ovddasvástádusa sámegielaid gullomis, oidnomis ja geavaheames buot servodatsurggiin.