Go lea mearrasámi vahkku, de mii bovdet duodjekursii gos beasat goarrut datneárpogiehtabátti. Kursaoahpaheaddji lea Hilde Lund Reisa Skinnprodukter fitnodagas.
Kursa bistá čieža diimmu juohke beaivvi. Váldde mielde biepmu ja juhkosa.
Ávnnaspáhkka máksá 250 ruvnno ja dan mávssát go kursa álgá.
Kurssa iešmáksu lea 700 ruvnno, ja dan mávssát rehkega bokte maid mii sáddet dutnje. Máksináigemearri lea guokte vahku ovdal go kursa álgá.
Jos cealkkát eret saji maŋemustá ovtta beaivvi ovdal go kursa álgá, de oaččut ruovttoluotta 50% kursadivadis. Eretcealkima sáddet lisell@lavgu.no čujuhussii. Jus cealkkát eret dan maŋŋel, de eat mávsse ruovttoluotta divada.
Kurssas leat ráddjejuvvon sajit, ja sii geat vuosttažin dieđihit, ožžot sajiid dađistaga gitta kursa dievvá.
Bures boahtin!
Dieđut mearrasámi vahku birra:
Prošeavtta ulbmil lea ovddidit mearrasámi kultuvrra, giela ja historjjá.
Jagis 2026 galgá mis leat mearrasámi mánnu, mii juhkkojuvvo njealji vahkkui olles jagis.
Mearrasámi vahkuid lágideami vuođđun lea sámi giellavahkku-konseapta, gos leat iešguđetlágan doalut ja lágideamit daid vahkuid. Mearrasámi vahku/mánu oktavuođas galgat gaskkustit ja čalmmustahttit mearrasámivuođa riddoguovlluin, ja buktit ovdan resurssaid mat gávdnojit dáid guovlluin, namalassii olbmuid, dávviriid, muitalusaid, jna.
Sámediggi lea ruhtadan prošeavtta.