Komponista ja musihkkár Johan Sara Jr. oaččui gieskat bálkkašumi dán jagáš komponistan Sámi Music Awardas. Sara Jr. lea guhka bargan musihkain, muhto maiddái eará dáiddašlájaiguin.
Boađe guldalit ságastallama gaskkal Johan Sara Jr. ja John-Kåre Hansena go soai ságastallaba ođđa, sámi musihka birra ja mearrasámi elemeanttaid birra musihkas ja hutkás ovdanbuktimiin.
Doalut leat nuvttá ja buohkaid váras.
Mearrasámi vahkku:
Prošeavtta ulbmil lea ovddidit mearrasámi kultuvrra, giela ja historjjá.
Jagi 2025:s galgá mis leat mearrasámi mánnu, juhkkojuvvon njeallje vahkkui jagis.
Vahkut leat vuođđuduvvon sámi giellavahku doahpagii, iešguđetlágan lágideamit dáid vahkuid. Mearrasámi vahkkus/mánus galgat gaskkustit ja čalmmustahttit mearrasámivuođa Álttá guovllus.
Prošeavtta lea Sámediggi ruhtadan.