Mii lágidit logaldallama ovttas Álttá sámiid servviin, dan oktavuođas go lea vássán 200 jagi dan rájes go veaikeruvkke ásahuvvui Gávvunnii.
1800-logu álggus lei Gávvuonna unna giláš gos eatnasat ledje mearrasápmelaččat. Maŋŋel go veaikeruvkke ásahuvvui dohko 1826:s, de rievddai giláš olles unna ruvkkegávpogažžan gos ásse kveanat ja dáččat.
Movt lei Gávvuonas ovdal veaikeruvkke, ja mii dáhpáhuvai sámi bearrašiidda geat orro doppe?
Maid gáldut muitalit mearrasápmelaččaid eallima birra veaikeruvkkeáigodagas?
Logaldalli: Ole David Østli
Álttá sámiid searvi guossoha snoahpamuša.
Dieđut mearrasámi vahku birra:
Prošeavtta ulbmil lea ovddidit mearrasámi kultuvrra, giela ja historjjá.
Jagis 2026 galgá mis leat mearrasámi mánnu, mii juhkkojuvvo njealji vahkkui olles jagis.
Mearrasámi vahkuid lágideami vuođđun lea sámi giellavahkku-konseapta, gos leat iešguđetlágan doalut ja lágideamit daid vahkuid. Mearrasámi vahku/mánu oktavuođas galgat gaskkustit ja čalmmustahttit mearrasámivuođa riddoguovlluin, ja buktit ovdan resurssaid mat gávdnojit dáid guovlluin, namalassii olbmuid, dávviriid, muitalusaid, jna.
Sámediggi lea ruhtadan prošeavtta.