Riddoguovlu ja mearraguollebivdu lea leamaš dehálaš mearrasámi eallinvuohkái ja biebmoárbevirrui.
Ovttasráđiid Álttávuona riddoservviin/Altafjord kystlagain mii bovdet mánáide gaskal 6 – 12 jagi guollebivdui fatnasiin (Mánáideahket ja Lávgulit). Riddosearvi boahtá fatnasiiguin oktan fanasveagain geat vudjet fatnasiiguin, ja čájehit maid midjiide muhtin boares bivdoneavvuid maiguin olbmot leat bivdán meara.
Buot mánát geat háliidit sáhttet vuolgit mielde fatnasii ja oahppat oaggut. Mii váldit mielde gádjunliivvaid buohkaide.
Lágideamis mii maid vuolgit ártna ohcat Árahávddis. Dološ áiggi olbmot bidje ruđa ja divrras dávviriid veaikegievdnái. Dán veaikegievnni jávistedje eatnamii. Dákkár čiehká gohčoduvvo Árahávdin.
Mii guossohit biepmu lágideamis.
Ovddasteaddjit geat leat dieđihan mánáideaset lágideapmái ožžot skovi maid galget deavdit ovdal lágideami.
Lágideapmi lea Klompagoppas Árinnjárggas, muhto ovddasteaddjit buktet mánáid Vefasii (Amtmannsnesveien 101:i) dii. 14.00. Dás mii vázzát fárrolaga fiervái gos lágideapmi dollojuvvo.
Dieđut mearrasámi vahku birra:
Prošeavtta ulbmil lea ovddidit mearrasámi kultuvrra, giela ja historjjá.
Jagis 2026 galgá mis leat mearrasámi mánnu, mii juhkkojuvvo njealji vahkkui olles jagis.
Mearrasámi vahkuid lágideami vuođđun lea sámi giellavahkku-konseapta, gos leat iešguđetlágan doalut ja lágideamit daid vahkuid. Mearrasámi vahku/mánu oktavuođas galgat gaskkustit ja čalmmustahttit mearrasámivuođa riddoguovlluin, ja buktit ovdan resurssaid mat gávdnojit dáin guovlluin, namalassii olbmuid, dávviriid, muitalusaid, jna.
Sámediggi lea dorjon prošeavtta.