Dáiddáris Christin Løkkes lea mearrasámi duogáš Ráissas, ja lea maŋimus jagiid čađahan mátkki oahppat ja váldit ruovttoluotta iežas mearrasámi kultuvrra. Dat boahtá ovdan su dáidagis.
Barggustis son gaskkusta mearrasámi historjjá ja movt su máttut elle ovdal garra dáruiduhttinpolitihka ja eváhko soađeáigge mii goasii jávkadii buot osiid ja mearkkaid mearrasámi kultuvrras.
Christin Løkke lea ožžon ollu positiivvalaš fuomášumi iežas dáidagiin. Okta su dáidagiin lea Duohtavuođa- ja seanadankommišuvnna raporttas. Árabut dán jagi son bođii vuosttažin Mediterranean ceramic gilvvus Itálias. Mii leat hui rámis go dáiddár iežas dáidagiiguin searvá Mearrasámi vahku lágideapmái Álttás.
Čájáhusa rahpamis lágiduvvo panelaságastallan fáttáin: Dáidaga sadji seanadeami guvlui.
Álttá sámiid searvi guossoha snoahpamuša.
Musihkkár John-Kåre Hansen čuojaha muhtin su šuoŋain. Dát šuoŋat heivejit juste Christin Løkke dáiddačájáhussii.
Dát lea čájáhus gos maiddái lea vejolaš oastit muhtin dáidagiid.
Lea nuvttá searvat rahpamii ja čájáhusas fitnat.
Govva: Torbjørn Brovold
Čájáhus lea Álttás gitta čakčamánu 25. beaivái čuovvovaš rabasáiggiiguin:
– Gaskavahku 02.09 dii. 17.00 – 19.00
– Sotnabeaivvi 06.09 dii. 13.00 – 15.00
– Mánnodaga 07.09 dii. 17.00 – 19.00
– Sotnabeaivvi 13.09 dii. 13.00 – 15.00
– Disdaga 15.09 dii. 15.00 – 17.00
– Sotnabeaivvi 20.09 dii. 13.00 – 15.00
– Gaskavahku 23.09 dii. 17.00 – 19.00
Dieđut mearrasámi vahku birra:
Prošeavtta ulbmil lea ovddidit mearrasámi kultuvrra, giela ja historjjá.
Jagis 2026 galgá mis leat mearrasámi mánnu, mii juhkkojuvvo njealji vahkkui olles jagis.
Mearrasámi vahkuid lágideami vuođđun lea sámi giellavahkku-konseapta, gos leat iešguđetlágan doalut ja lágideamit daid vahkuid. Mearrasámi vahku/mánu oktavuođas galgat gaskkustit ja čalmmustahttit mearrasámivuođa riddoguovlluin, ja buktit ovdan resurssaid mat gávdnojit dáin guovlluin, namalassii olbmuid, dávviriid, muitalusaid, jna.
Sámediggi lea dorjon prošeavtta.